У госці да “Пінскай шляхты”
24.02.2017З мэтай прывіцця цікавасці да мастацтва, развіцця эстэтычнага густу, кругагляду 24 лютага 2017 года вучні 9 класа нашай школы сумесна з вучнямі Чухаўскай СШ наведалі ДУ “Палескі драматычны тэатр”. Увазе гледачоў была прадстаўлена візітоўка тэатра – п’еса заснавальніка беларускай драматургіі В. Дуніна-Марцінкевіча “Пінская шляхта” (рэжысёр І. Базан).
Наведванне тэатра – заўсёды свята, а калі гэта ўпершыню, то тым больш. Адпаведны настрой атрымалі вучні ўжо пры ўваходзе ў храм мастацтва: ззянне агромністых люстраў, люстэрак у пазалочаных рамах, упрыгожаная ўсемагчымай пышай ляпнінай столь – усё выклікала ўзвышаныя пачуцці пакланення прад мастацтвам.
Пастаноўка была надзвычай цікавай і захапляльнай. Яна стварыла на юных гледачоў цудоўнае ўражанне: апладзіравалі стоячы! Прыгожыя дэкарацыі (асабліва карэта Кручкова!), касцюмы, песні, танцы… Асабліва спадабаўся дзецям вобраз Пісулькіна.
Выходзячы з залы, вучні прасілі неадкладна залічыць іх у склад групы для наступнага наведвання тэатра, прычым зусім не важна, на якую пастаноўку. Нездарма ж кажуць: лепш адзін раз убачыць, чым сто разоў пачуць. Вучняў перапаўнялі пачуцці навізны перажыванняў і незабыўных уражанняў!
Настаўніца беларускай мовы
і літаратуры А.Я. Рэбкавец